Excitement, ek majedar pahlu jo bachpan se budhape tak insaan ko ehsaas dilate rehta hai ki ye pal bus uska hai. Excitement us har pal me hota jisse pehli dafa rubaru hone ko insaan hota hai. Umra k har dahlij pe iska roop jarur badalta gaya hai lekin ehsaas wahi khhusi wahi. Mujhe yaad hai school k wo din jab mai pencil use karta tha (pen allowed nahi hote thhe) . Dusro ko dekhta jo pen use karte thhe , us waqt sochta tha ki mai kab likh paunga pen se, excitement hoti thhi us intejar me jo har gujarte huye pal k sath mujhe us excitement k aur kareeb le aata tha jab mai v pen use kar pata. Waqt badla , wo pehla cricket bat jo mujhe is sart pe mili thi ki mai first aaunga to milega. Jis waqt ye awaz mere ears me ayi ki cricket bat milne ko hai excitement apne height pe tha, 4th rank tha jab 4th std me tha fir v maa ka pyar tha jo bat v mila. Pehli baar train k reservation coach me jane ka xcitement , Wo pehla date , pehli baar kisi ka wait kara boht kuch pehla jisne life me excitement k colors bhharey.
Ab zindgi k ek alag mod pe jaha kafi kuch decisions khud le chuka , malum v nahi ki kitni dafa gira aur kitne hath aaye thhe uthhane ko. Alag mod pe zindagi 23 saal ka ho gaya. 2014 ek aisa saal jiske aadhe din in muddo pe nikal gaye ki hindustan ka agla pm kaun hoga. Har naye din k sath hawao me gunjte awaz jo mujhe v dhhirey dhhirey excited kar rahe the ki yes, i am more than 18 and i will vote. 2009 jo 2 months kam hone ki wajah se voting right nahi mila tha is baar wo right hai mere paas. Meri sari narajgi jo is desh k govt k liye hai, system k liye hai ya dusri har chiz se jiska sarokar meri zindgi se hai, jise hum aksar train me metro me bus me ya fursat k waqt me jordaar bahas me nikal dete hai. Is baar mauka hai. Mauka hai batane ka ki nahi ye roj roj rupya ka dollar k comparison me girna mehangayi aur badha rahi hai. Mauka hai batane ka ki jis jagah ko desh ka dil kehte hai wo ladkio k liye safe nahi hai. Mauka hai ye batane ka ki hindustan azad desh hai aur kisi ko insaaf dilane k liye log sadko pe aate hai to maksad sirf insaaf dilana hota hai aur sarkar ne lathiya logo pe nahi hindustan k loktantrik hone ki garima pe chalaya tha. Ye mauka hai batane ka chhote kapde nahi gandi soch hoti hai, ladkia shikar hindustan k har koney me har roj hoti hai. Ye mauka hai ye batane ko loktantra me praja he raja hoti hai jiske ungli k ishare pe sarkar badal jati hai.
April k pehle week se voting start ho gayi aur meri excitement us waqt se he haawi hone lagi. Har gujarte pal k sath sochta jata ki 12 may me itna din baaki hai. Har roj news channels dekhta , kisne kaha kya kaha . News channel wale har dusre sahar jate logo se baatein karte. Mai v sochta ki yaha v koi aaega. Waqt nikalta gaya koi news channel nahi aaye, agar aatey to unhe logo se jyada muddey najar aa jate. Bihar UP aur india - nepal k border pe Ramnagar ek chhota sa sahar jo aaj v sarkar ki taraf se ane wale roshni ka intejar kar raha hai. Valmikinagar constituency jaha se 14 candidate , ye mera constituency hai. Logo ki bahas ko baarik se padhne ki kosis karta raha aur in the end jitna samajh paya wo ye tha ki election aaj v logo k liye muddo se alag hai aur voting religion based reh gaya hai.
Ek lahar mehsus kia maine v jo 3000km dur gujrat se chali ho ya 400km dur banaras se. Modi lahar kehna besak sahi hoga kyoki hindustan ki saari party ek taraf aur ek modi ek taraf. Hindustan k itihaas me ye pehli dafa ho raha hai ki election ruling party k against na ho k BJP k ek candidate k against centalized ho gaya.
11th may ka din ye plan karne me nikal gaya ki kitne baje jau ki apne booth ka first voter rahu. Jaldi so gaya, election subah 7 baje se hone the mai 6 baje he nikal gaya aur jab waha pahucha to mehsus hua ki mai v voters k bich ka ek voter bus hu jisey 50 logo k piche line me khhule aasman k niche khada hona tha jab suraj devta badan sukhhane ko aasman me dikhne lagey the. Har nikalte huye voter k sath mai apni position check karta ki ab itne baaki hai. Besak bachpana keh sakte ho lekin ye v sach hai excitement he insaan ko bachha v banati hai warna insaan to khud ko hamesa dusro se jyada akalmand samajhhta hai.
Maine booth pe dekha ki log apne cellphones le k aaye hai jabki mai raat me kam se kam 5 baar parchi padhta raha ki kya likha hua hai aur usme likha tha ki cellphone allowed nahi hai. Anyways, Ab mera number tha. Voting booth k andar gaya , gattey se covered tha ek chhota sa dabba. Mai sochne laga ki aise he kitne dabbe is desh ki disha tay kar rahe hai . fir candidates k naam padhne laga aur unke symbols dekhne laga. Booth k bahar officer ne bola ki bahar aane ko aur v log hai. Maine fatak se bola ki pehli baar vote kar raha hu soch samajh k karunga, Sochna samajhhna to kuch nahi tha wo to aise he bola maine. Mujhe to sab kuch mehsus karna tha jo mai kar raha tha. Mai vote de chuka tha. Bahar niklae waqt kafi khus tha. Yes, i have voted. Candidate jita to khhusi hogi aur na jita to udaas v nahi honewala. Achha laga , pehli dafa maine v apna faisla sunaya ek button se he sahi. Sayad mera ek vote kuch khas asar na karey . Lekin ek ki ahmiyat hoti hai. Ek vote se america ka national language spainish ki jagah english ho gaya aur ek seat se atal ji ki sarkaar gir gayi. Mai khus tha, bohat khus tha. Ek excitement tha jisko jiya. Ek ehsaas mehsus kia. Dil ko achha laga. Mere liye ek yaadgaar din raha.
